Ma xusuusto goortii u horaysay ee
aan taraawiix tukado, waxaanse si wacan u xusuusnahay aniga oo ku daba safan oo
dhegaysanaya codkii macaanaa ee Allah ha u naxariistee Sh. Cabdiraxmaan Aw
Gamboole, imaamkii hore ee masaajidka Harawo, Borama. Aayadihii uu inta badan
nagu tujin jiray iyo luuqdii cajaa’ibka ahayd ee uu Quraanka u akhriyi jiray
intuba wali maskaxdayda kama bixin. Sidoo kale, Sh. Cali Waasac Rabbi ha u
raxmadee oo ducooyin badan ku akhriya cod aad u macaan ayaan si fiican u
xusuustaa. Sida aan codkiisii macaanaa u xusuus nahay ayaan wali u xafidsanahay
in badan oo ka mid ah dikrigii iyo ducooyinkii uu masaajidka ka akhriyi jiray
Ramadaan walba.Marka laga yimaado, ducooyinkii sida jamaca ah loo wada akhriyi
jiray Ramadaanta, salaad walba ka dib, waxaan aad u jeclaa oo aan ka heli jiray
kuwa xilliga taraawiixda la akhriyi jiray.
Aw Cabdi Muxumed, Allah ha u
naxariistee, imaamkii masjid Jaamaca ayaan isna codkiisii uu ku akhriyi jiray
siiqad Soomaaliga aad u xusuusnahay. In badan baan anaga oo is eryanayna, duhur
iyo casar inta u dhexaysa, Aw Cabdi iyo odayaal masaajidka dhinaca dhulka yara
dhigay jiif u diidnaye, Allow naga dhaaf.
Ma ilaawi karo, codkii qalbiga
dhaqaajinayay ee Sh. Cabdilaahi Muuse Diiriye, Rabbi ha u raxmadee. Quraan ruug
codkiisa iyo qaabka uu Quraanka u akhriyaaa xiiso gaar ah lahaayeen buu ahaa.
Habeenka aad u baahato taraawiix
fudud iyo cod imaam oo qalbiga taabanaya, Geed-Goble iyo Sh. Maxamuud Caateeye
iyo dikrigii ka danbeeyey ayaa kugu soo baxayay.
Hilmaami maayo dhallinyartii
danbe ee Quraan xaafidka ahayd ee in badan dhagahayaga ugu raaxeeyey Quraan
akhriska iyo noolaynta cibaadada habeenimo Ramadaano badan, ku dhawaad
saddexdii tobanle ee aan ka soo gudubnay. Mid mid uma tirin karnee Ilaahay
dhammaantood ha ka abaalmariyo.
Dhawrkii sanno ee la soo
dhaafay, masaajidka Parkland ee magaalada tan Nayroobi ayaan ku taxnaa oo cibaadada
habeenkii ku dhamaysanayay. Bad-xidhankan maanta ka hor, safarada shaqo oo dhan
baan iska joojin jiray, bisha baraykaysan ee Ramadaan, mid mid laga maarmi
waayo ma ahine. Ma ahi dadka fasax gala Ramadaanta, xitaa tobanka u danbeeya ee
Ramadaan. Waxaan ogaaday shaqada iyo cibaadada habeenkii marka aad isla
fahanto, in badan inay is dhamaystiraan ee aanay caqabad isku ahayn.
Sanadkan oo shantii toddobaad ee
u danbeeyey aanan salaad masaajid ku tukan, jimcana ku dhahoo, ayay Ramadaan
soo gashay. Ramadaan bilaa taraawiix ahi waa ugub iyo lama-arag aan wali
taariikhda casriga ah soo marin. Waa hakad ku yimid dhaqan suuban iyo cibaado
qarniyaal soo taxnayd.
Carruurta oo aan arrintan ka
sheekaysanay ayaa iyaguna walaac xoog leh ka muujiyey. Iyagu waliba mid bay ina
dheer yihiin. Rabbi kama dhigee, waa ciid la’aanta ku soo fool leh!
Inkasta oo aan mawlaca gurigayga
siraatay oo aniga iyo qoyskuba aan halkan ku oogno cibaadada, haddanna waxay
naftu si hillow badani ku jirto ugu harraad qabtaa barakadii jamaca iyo
jamaacada. Waxay ruuxdu u oomman tahay, naftuna boholyoow u qabtaa masaajidadii
habeenada Ramadaan sida gaarka ah loo soo cammiri jiray. Waxaan tebayaa
cibaadadii habeenka ee taraawiixdu u mudnayd ee sida wadarta ah loo oogayay.
Ilaaha wayn ayaan ka rajaynayaa inuu inagu simo sanadka danbe,
anagoo nabad ah iyo Ramadaan oo mar kale marti la jecel yahay ah, iyo dunidoo ka soo
kabatay lama-aragtan maanta taagan, si aan mar kale u kala sahay qaadano,
idanka Eebe.
W/Q: Cabdiraxmaan Aadan Maxamuud
Email: abdirahman.adan@gmail.com
